Poet
dab ga.i kyuun miri avaz kaho to kah duun
is bhari bazm men vo raaz kaho to kah duun
mere naghmon ko sar-e-bazm tarasne vaalo
be-sada kyuun hai mira saaz kaho to kah duun
apne mohsin ka bhi ehsan bhulane vaale
kis ne baḳhsha tumhen e.azaz kaho to kah duun
kaise ghairon ko mila gosha-e-pinhan ka suragh
kaun nigaran tha daghabaz kaho to kah duun
jab tumhen apni gharaz thi to mila di tum ne
kis ki avaz men avaz kaho to kah duun
jism-e-inkar pe iqrar ka rahta hai libas
un ki guftar ka andaz kaho to kah duun
mujh men ‘kausar’ thi nihan taqat-e-parvaz magar
kis ne kaaTe par-e-parvaz kaho to kah duun
Leave a Reply