Chust Kamar Ka Kya Sabab Tang Qaba Ki Wajh Kya

chust kamar ka kya sabab tang qaba ki vajh kya

ham to hain aap sar-ba-kaf ham se ada ki vajh kya

khaak men jo mila ho khud us pe sitam se kya husul

husn ki ye sarisht hai varna jafa ki vajh kya

apni hain jaisi khaslaten mujh pe bhi hai guman vahi

ye nahin gar sabab to phir tark-e-vafa ki vajh kya

mashrab-e-ishq men dila kufr hai yaar se riya

jab ki buton ka dhyan ho zikr-e-khuda ki vajh kya

aaj kiye hazar qatl kal kiye aur bhi siva

shaghl ye jis nigah ka ho us ko haya ki vajh kya

ruh-o-jasad ka sabiqa kitne dinon ka hai bhala

donon ki jins do hai jab un men vafa ki vajh kya

sadma-e-dard-o-ranj-o-gham tul-e-firaq ka alam

hain ye havadisat chand un ki baqa ki vajh kya

sun len jo vo zahe-nasib gar na sunen to kya gila

hai ye unhin se guftugu tark-e-dua ki vajh kya

malik-e-dil hain jab vahi jab hai unhin ka ikhtiyar

murtakib-e-gunah kyuun jurm-o-khata ki vajh kya

roe hain ham zarur ‘shad’ tab to hai lab pe ah-e-sard

menh na baras gaya to phir thanDi hava ki vajh kya

Leave a Comment