Sheikh Ibrahim Zauq
chupke chupke gham ka khana koi ham se siikh jaae
ji hi ji men tilmilana koi ham se siikh jaae
abr kya aansu bahana koi ham se siikh jaae
barq kya hai tilmilana koi ham se siikh jaae
zikr-e-sham-e-husn laana koi ham se siikh jaae
un ko dar-parda jalana koi ham se siikh jaae
jhut-mut afyun khana koi ham se siikh jaae
un ko kaf la kar darana koi ham se siikh jaae
sun ke aamad un ki az-khud-rafta ho jaate hain ham
peshva lene ko jaana koi ham se siikh jaae
ham ne avval hi kaha tha tu karega ham ko qatl
tevaron ka taad jaana koi ham se siikh jaae
lutf uthana hai agar manzur us ke naaz ka
pahle us ka naaz uthana koi ham se siikh jaae
jo sikhaya apni qismat ne vagarna us ko ghair
kya sikhaega sikhana koi ham se siikh jaae
dekh kar qatil ko bhar laae kharash-e-dil men khuun
sach to ye hai muskurana koi ham se siikh jaae
tiir o paikan dil men jitne the diye ham ne nikal
apne hathon ghar lutana koi ham se siikh jaae
kah do qasid se ki jaae kuchh bahane se vahan
gar nahin aata bahana koi ham se siikh jaae
khat men likhva kar unhen bheja to matla dard ka
dard-e-dil apna jatana koi ham se siikh jaae
jab kaha marta huun vo bole mira sar kaat kar
jhuut ko sach kar dikhana koi ham se siikh jaae
vaan hile abru yahan pheri gale par ham ne tegh
baat ka iima se paana koi ham se siikh jaae
tegh to ochhi padi thi gir pade ham aap se
dil ko qatil ke badhana koi ham se siikh jaae
zakhm ko siite hain sab par sozan-e-almas se
chaak siine ke silana koi ham se siikh jaae
puchhe mulla se jise karna ho sajda sahv ka
sikhe gar apna bhulana koi ham se siikh jaae
kya hua ai ‘zauq’ hain juun mardumuk ham ru-siyah
lekin ankhon men samana koi ham se siikh jaae
Leave a Reply