Rajinder Manchanda Bani
chhupi hai tujh men koi shai use na gharat kar
jo ho sake to kahin dil laga mohabbat kar
ada ye kis kaTe patte se tu ne sikhi hai
sitam hava ka ho aur shaḳh se shikayat kar
na ho muḳhil mire andar ki ek duniya men
baḌi ḳhushi se bar-o-bahr par hukumat kar
vo apne aap na samjhega tere dil men hai kya
ḳhalish ko harf bana harf ko hikayat kar
mire bana.e hue but men ruuh phunk de ab
na ek umr ki mehnat miri akarat kar
kahan se aa gaya tu bazm-e-kam-yaqinan men
yahan na hoga koi ḳhush hazar ḳhidmat kar
kuchh aur chizen hain duniya ko jo badalti hain
ki apne dard ko apne liye ibarat kar
nahin ajab isi pal ka ho muntazir vo bhi
ki chhu le us ke badan ko zara si himmat kar
ḳhulus tera bhi ab zad men aa gaya ‘bani’
yahan ye roz ke qisse hain ji bura mat kar
Leave a Reply