Sabihuddin Shaibi
jis ko itna chaha main ne jis ko ghazal men likkha chand
chhoḌ gaya hai mujh ko kaise aaj vo mera apna chand
apne chand ki sochon men gum baiTha tha tanha.i men
jaane mere dil ke suune angan men kab nikla chand
chhup jaa.e kabhi samne aa.e khele ankh-micholi kyon
meri jaan mujhe lagta hai bilkul tere jaisa chand
dukh ho sukh ho ranj ḳhushi ho mushkil ho ya asani
har mausam men saath nibha.e mera yaar purana chand
nafsa-nafsi ka aalam hai sab ko apni fikr paḌi
apni dharti apna ambar apna suraj apna chand
chehron se ḳhushiyan ojhal hain aur ghamon se dil bojhal
ab ke apne des men nikla iid pe jaane kaisa chand
Leave a Reply