Chhupe Hue Hain Sar-E-Rah Sau KHatar KHamosh

chhupe hue haiñ sar-e-rāh sau ḳhatar ḳhāmosh

chale chalo mere yārān-e-ham-safar ḳhāmosh

fazā-e-qarya tilism-e-sukūt meñ gum-sum

siyāh raat ke dāman meñ bām-o-dar ḳhāmosh

hamāre baa’d agar rustaḳhez ho bhī to kyā

bisāt-e-vaqt se ham to ga.e guzar ḳhāmosh

ba-īñ navāzish-e-mausam shaguft-e-gul pe na jā

zabān-e-hāl se goyā ba-chashm-e-tar ḳhāmosh

jo arsh-e-jāh sitāra-shikār the un ko

falak kī aañkh ne dekhā faganda-sar ḳhāmosh

har ek daur meñ gūñjī hai zarbat-e-farhād

kabhī bhī rah na sake sāhab-e-hunar ḳhāmosh

zabāñ-darāz ‘ziyā.ī’ ko rokiye sāhab

ye maslahat kā taqāzā hai al-hazar ḳhāmosh

Leave a Comment