zafar-iqbal

Chhupa Hua Jo Numudar Se Nikal Aaya

chhupa hua jo numudar se nikal aaya

ye farq bhi tire inkar se nikal aaya

palat pada jo main sar phod kar mohabbat men

to rasta isi divar se nikal aaya

mujhe kharidna kuchh bhi na tha isi khatir

main khud ko bech ke bazar se nikal aaya

abhi to apne khanDar hi ki sair thi baaqi

ye tu kahan mire asar se nikal aaya

bahut se aur tilismat muntazir hain mire

agar kabhi tire asrar se nikal aaya

mujhe bhi de rahe the khilat-e-vafa lekin

nazar bacha ke main darbar se nikal aaya

sire se jo kahin maujud hi na tha akhir

vo naqs bhi mire kirdar se nikal aaya

nai faza nae afaq hain usi ke liye

jo aaj udti hui Daar se nikal aaya

usi ko ek ghanimat qarar dunga ‘zafar’

jo ek sher bhi tumar se nikal aaya

More Poems

Leave a Comment