chhod kar mujh ko chali ai bevafa main bhi to huun
le khabar meri bhi ai tegh-e-ada main bhi to huun
pi rahe hain sab piyali par piyali bazm men
meri baari bhi to aae saqiya main bhi to huun
zikr jab hur-o-pari ka samne un ke hua
pahle to sunte rahe vo phir kaha main bhi to huun
dukht-e-raz zahid se boli mujh se ghabrate ho kyuun
kya tumhin ho pak-daman parsa main bhi to huun
khaas zahid ke liye jannat to ho sakti nahin
akhir ik banda ‘sharaf’ allah ka main bhi to huun
Leave a Reply