Raheel Farooq
chhin ga.e ḳhud se tumhare ho ga.e
tum pe ashiq dil ke maare ho ga.e
kuchh din avara phire sayyara-var
rah ga.e tum par sitare ho ga.e
tujh pe qurban ai jamal-e-ahd-e-soz
jis ke biyahe bhi kunvare ho ga.e
kya usi ko kahte hain rabt-e-dili
chor dil ke jaan se pyare ho ga.e
ham the tere ḳhaksaron men shumar
hasidon men chand-tare ho ga.e
chaar nazren chaar baten chaar din
ham tumhare tum hamare ho ga.e
ik nazar karne se tera kya gaya
ahl-e-dil ke vare-nyare ho ga.e
kuchh to ḳhud dil phenk the ‘rahil’ ham
kuchh udhar se bhi ishare ho ga.e
Leave a Reply