chashm-e-tar raat mujh ko yaad aai
apni auqat mujh ko yaad aai
nala-e-dil par aah ki main ne
baat par baat mujh ko yaad aai
abhi bhuli thi dukht-e-raz tauba
phir vo bad-zat mujh ko yaad aai
zulf men dekh khaal ko us ke
shab ki vo ghaat mujh ko yaad aai
dekh laala ka rang us ki kafak
aaj haihat mujh ko yaad aai
ji pe jis ke sitam kahin dekha
dil ki auqat mujh ko yaad aai
dekh rote ‘hasan’ ko shiddat se
par ki barsat mujh ko yaad aai
Leave a Reply