chand viran hai sadiyon se mire dil ki tarah
zindagi gham hai ḳhala men miri manzil ki tarah
kurra-e-arz hai ik markaz-e-hangama-e-shauq
bahr-e-be-ab men tahzib ke sahil ki tarah
zarra-e-ḳhak se hai sho.ala-e-jauhar ki numud
jis ne suraj ko bhi dekha hai muqabil ki tarah
kal ke changez-o-halaku hain pas-e-parda-e-ḳhak
surḳh-ru the jo kabhi ḳhanjar-e-qatil ki tarah
mere qadmon ke nishan chand pe raḳhshanda hain
aap aa ja.iye avara-e-manzil ki tarah
girah-e-sham-o-sahar ahl-e-ḳhirad se na khuli
zindagi aaj bhi hai uqda-e-mushkil ki tarah
Leave a Reply