fasad-e-shahr tham gaya
faza men bas gai hai ek zahr-nak khamushi
hiras khauf bebasi
main kha raha huun pi raha huun ji raha huun kis tarah
ye narm luqma-e-ghiza
garm ghunt chaae ka
kisi khayal ke tale
jale hue lahu ke zaiqe sa munh men jam gaya
fishar-e-kisht-o-khun ke baad
muztarib sukut
jaise dhadkanon ke raste men tham gaya
shuur-e-umr-o-zindagi simat gaya hai karb ke jumud men
shigaf pad gaya hai jaise duur tak vajud men
vo kaifiyat hai
jaise ghar men koi mar gaya ho aur
us ki laash der tak zamin par dhari rahe
koi jagah se hil ke
us ko dafn tak na kar sake
Leave a Reply