chand lamhat men sadiyon ka maza le aaya
ya kahun baiThe-biTha.e hi bala le aaya
ḳhud ko uljha ke zamane ke masa.il men idhar
main tiri yaad se apne ko bacha le aaya
aag se aag to lohe se kaTega loha
lo naya zaḳhm purane ki dava le aaya
ek taqsir ki main jis ki muafi ke liye
har dafa ek na.i aur saza le aaya
surḳh ankhen liye vo apni udhar lauT gaya
main idhar apna ruvansa sa gala le aaya
tujh ko pa kar bhi nadamat men mare jaata huun
ki kisi aur ke hisse ki vafa le aaya
Leave a Reply