chamka hai yuun nasib ka taara kabhi kabhi
ham ko to ḳhud usi ne pukara kabhi kabhi
le Dubta hai dil ko sahara kabhi kabhi
manjdhar ban gaya hai kinara kabhi kabhi
ye bhi hua hai haal hamara kabhi kabhi
apne ko ham ne aap pukara kabhi kabhi
apne se be-niyaz hua ja raha huun main
sun sun ke tum se haal tumhara kabhi kabhi
saath apne sham-e-hijr ke jagun ki aas bhi
le Dubta hai subah ka taara kabhi kabhi
tufan se bachne vaale bahut shadman na ho
kashti pe phaT paḌa hai kinara kabhi kabhi
‘manzar’ shikayaton ki talafi zarur hai
ik sajda shukr ka bhi ḳhudara kabhi kabhi
Leave a Reply