chamak kaisi rukh-r-anvar men hai
zamana saara hi asrar men hai
lagaen apne fan-paron ki qimat
ki ab har chiiz hi bazar men hai
kai ankhen gadhi jaati hain mujh men
koi rauzan dar-o-divar men hai
raha huun muntazir jis ka azal se
vahi chehra mire afkar men hai
nahin pahla sa ab rang-e-baharan
ki virani gul-o-gulzar men hai
hadis dil bayan kaise ho ‘asi’
mujhe mushkil bahut iz.har men hai
Leave a Reply