Chamak-Damak Pe Na Jao Khari Nahin Koi Shai

chamak-damak pe na jaao khari nahin koi shai

sivae shakh-e-tamanna hari nahin koi shai

dil-e-gudaz o lab-e-khushk o chashm-e-tar ke baghair

ye ilm o fazl ye danish-vari nahin koi shai

to phir ye kashmakash-e-dil kahan se aai hai

jo dil-giraftagi o dilbari nahin koi shai

ajab hain vo rukh o gesu ki samne jin ke

ye subh o shaam ki jadugari nahin koi shai

malal-e-saya-e-divar-e-yar ke aage

shab-e-tarab tiri nilam-pari nahin koi shai

jahan-e-ishq se ham sarsari nahin guzre

ye vo jahan hai jahan sarsari nahin koi shai

tiri nazar ki gulabi hai shisha-e-dil men

ki ham ne aur to is men bhari nahin koi shai

Leave a Comment