Poet
chain kab aata hai ghar men tire divane ko
phir liye jaati hai vahshat mujhe virane ko
tum miTate ho jo mujh ko to samajh lo ye bhi
sham.a roti hai bahut maar ke parvane ko
hai agar aish kisi ko to bala se apni
ham to paida hue hain ranj-o-alam khane ko
ḳhud bhi suuli pe chaḌha yaar ko rusva bhi kiya
kya kahe ab koi mansur se divane ko
bu haqiqat ki na ho to gul-e-mazmun kya hai
phuul kaghaz ka hai ik dekhne dikhlane ko
naam ko bhi na kisi aankh se aansu nikla
sham.a mahfil men jalati rahi parvane ko
koi hamdard nahin apna zamane men ‘zafar’
aazma dekha hai har apne ko begane ko
Leave a Reply