Chain Aata Nahin Un Se Mulaqat Kiye Bin

Parveen Kaif

chain aata nahin un se mulaqat kiye bin

bolen na vo main rahti nahin baat kiye bin

kambaḳht havaon ne ye kya keh diya un se

kyon abr uḌe jaate hain barsat kiye bin

mai aa ga.i ghar men ye ḳhabar shaiḳh na sun len

lauT a.enge masjid se munajat kiye bin

shayad unhen Dar ho main shikayat karungi

aa.e the ga.e pursish-e-halat kiye bin

tum un se koi baat isharon men na karna

kam-fahm na manenge savalat kiye bin

sultan ko apna koi shahkar na kar pesh

chhoḌega na vo tujh ko qalam haath kiye bin

kya vaz.a banate hain siyasat ke masha.iḳh

aabid nazar aate hain ibadat kiye bin