Zarur Chashm-E-Tamasha Chaman Pe Naz Kare

zarūr chashm-e-tamāshā chaman pe naaz kare

magar bahār-o-ḳhizāñ meñ to imtiyāz kare

mirī hayāt kā maqsad hai sirf lazzat-e-ġham

koī ye silsila-e-ġham zarā darāz kare

junūñ ke daur meñ ho jis ko shauq-e-gul-chīnī

chaman meñ kaise vo kāñToñ se ehtirāz kare

yahī hai ḳhāliq-e-jazbāt kā karam shāyad

tumheñ ḳhushī se hameñ ġham se sarfarāz kare

na kījiye kisī gustāḳhī-e-junūñ kā malāl

kise hai hosh ki farq-e-niyāz-o-nāz kare

rah-e-vafā meñ tamannā-e-iltifāt hai kufr

jo jī meñ aa.e vo husn-e-karishma-sāz kare

jabīn-e-shauq to rakh dī hai maiñ ne dar pe tire

ye terā kaam hai bāb-e-karam bhī baaz kare

sunā hai rāz-e-haqīqat usī hijāb meñ hai

jo dīda-var ho vahī azmat-e-majāz kare

vo koī dil nahīñ patthar hai asl meñ ‘ashraf’

jo aadmī ko mohabbat se be-niyāz kare

Leave a Comment