Ashraf Rafi
zarur chashm-e-tamasha chaman pe naaz kare
magar bahar-o-ḳhizan men to imtiyaz kare
miri hayat ka maqsad hai sirf lazzat-e-gham
koi ye silsila-e-gham zara daraz kare
junun ke daur men ho jis ko shauq-e-gul-chini
chaman men kaise vo kanTon se ehtiraz kare
yahi hai ḳhaliq-e-jazbat ka karam shayad
tumhen ḳhushi se hamen gham se sarfaraz kare
na kijiye kisi gustaḳhi-e-junun ka malal
kise hai hosh ki farq-e-niyaz-o-naz kare
rah-e-vafa men tamanna-e-iltifat hai kufr
jo ji men aa.e vo husn-e-karishma-saz kare
jabin-e-shauq to rakh di hai main ne dar pe tire
ye tera kaam hai bab-e-karam bhi baaz kare
suna hai raz-e-haqiqat usi hijab men hai
jo dida-var ho vahi azmat-e-majaz kare
vo koi dil nahin patthar hai asl men ‘ashraf’
jo aadmi ko mohabbat se be-niyaz kare
Leave a Reply