Buto Ye Shisha-E-Dil Tod Do Khuda Ke Liye

buto ye shisha-e-dil tod do khuda ke liye

jo sang-dil ho to kya chahiye jafa ke liye

saval yaar se kaisa kamal-e-ulfat ka

ki ibtida bhi to hai shart intiha ke liye

khuda se tujh ko sanam mangte to mil jaata

magar adab ne ijazat na di dua ke liye

azab-e-atish-e-furqat se kanpta tha dil

hazar shukr jahannam mila saza ke liye

na dil laga ke hua mujh se ishq men parhez

bigad gaya jo kisi ne kaha dava ke liye

mila unhen bhi talavvun mujhe bhi yak-rangi

khususiyat na rahi sarsar o saba ke liye

khuda ne kaam diye hain juda juda sab ko

sanam jafa ke liye hain to ham vafa ke liye

jahan-navard rahe ham talash-e-matlab men

chale na ek qadam ghair-e-mudda.a ke liye

mushaira men padho shauq se ghazal ‘bimar’

ki mustaid hain sukhan-sanj marhaba ke liye

Leave a Comment