Gulzar Dehlvi
biTha ke dil men giraya gaya nazar se mujhe
dikhaya turfa-tamasha bala ke ghar se mujhe
nazar jhuka ke uTha.i thi jaise pahli baar
phir ek baar to dekho usi nazar se mujhe
hamesha bach ke chala huun main aam rahon se
haTa saka na koi meri rahguzar se mujhe
hayat jis ki amanat hai saunp duun us ko
utarna hai ye qarza bhi apne sar se mujhe
subu na jaam na miina se mai pila be-shak
pila.e ja mire saaqi yunhi nazar se mujhe
jo baat hoti hai dil men vo kah guzarta huun
nahin hai koi gharaz ahl-e-ḳhair-o-shar se mujhe
na dair se na haram se na mai-kade se mila
sukun-e-ruh mila hai jo tere dar se mujhe
kisi ki rah-e-mohabbat men baḌhta jaata huun
na rahzan se gharaz hai na rahbar se mujhe
zara to soch hiqarat se dekhne vaale
zamana dekh raha hai tiri nazar se mujhe
zamana meri nazar se to gir gaya lekin
gira saka na zamana tiri nazar se mujhe
ye rang-o-nur ka ‘gulzar’ dahr-e-fani hai
yahi payam mila umr-e-muḳhtasar se mujhe
Leave a Reply