Binai Se Bahar Kabhi Andar Mujhe Dekhe

binai se bahar kabhi andar mujhe dekhe

mumkin hi nahin hai vo barabar mujhe dekhe

ho jaae kabhi raat mire dam se bhi raushan

vo shama-e-tamasha jo ghadi-bhar mujhe dekhe

main khud men to maujud hi mushkil se rahunga

har dekhne vaala mire bahar mujhe dekhe

Dhunde koi mujh ko to isi khak-e-havas men

ya silsila-e-sail-e-hava par mujhe dekhe

mahaul hi kuchh ho chaman-e-khvab ka aisa

bulbul mujhe samjhe to gul-e-tar mujhe dekhe

ab dekhna hi shart ye thahri hai ki yuun ho

main manzar-e-nayab ko manzar mujhe dekhe

dariya ki pazirai men shak to nahin lekin

ik lahar ho aisi bhi ki uth kar mujhe dekhe

main baar digar hi kahin aata huun samajh men

jo dekhna chahe so mukarrar mujhe dekhe

mera nazar aana hai ‘zafar’ baat hi kuchh aur

jo dekh nahin sakta vo aksar mujhe dekhe

Leave a Comment