rahbar rah-numa koi nahin hota hai
rah-e-ulfat men saga koi nahin hota hai
mujh ko ḳhalvat men bhi tum yaad nahin aate ho
ḳhud pasandi se bura koi nahin hota hai
dukh ke mausam men dilase ke liye mere saath
ya to main hota huun ya koi nahin hota hai
ham yatimon ko dua raas nahin aati hain
ham yatimon ka ḳhuda koi nahin hota hai
koi saaya na koi phuul na panchhi koi
sukhte peḌ ka kya koi nahin hota hai
us se bichhḌa to mujhe bhuul ga.i ḳhalq-e-ḳhuda
ghar se niklon ka pata koi nahin hota hai
Leave a Reply