bimar ho gaya huun shifa-ḳhana chahiye
ye saara shahr mujh ko bayabana chahiye
sanson ki zarb se na kaTega hamara habs
ham ko to ek puura hava-ḳhana chahiye
yuun hi dikha rahi hai mohabbat ke sabz baagh
mere badan ko ruuh se harjana chahiye
taḳhir ho ga.i to bikhar ja.ega badan
aghosh-e-yar ab tujhe khul jaana chahiye
phir davat-e-gunah mili ik nigah se
phir meri parsa.i ko sharmana chahiye
vo jalva samne ho to kaisi dua-salam
bas dekhte hi kaam pe lag jaana chahiye
dekhen to kaun jaata hai mahmil men ḳhvab ke
ta.abir ke ghazal ko dauḌana chahiye
udham macha rahe hain bahut log shahr ke
‘ehsas-ji’ ko dasht se bulvana chahiye
Leave a Reply