Kishwar Naheed
bimar hain to ab dam-e-isa kahan se aae
is dil men dard-e-shauq-o-tamanna kahan se aae
bekar sharh-e-lafz-o-maani se faeda
jab tu nahin to shahr men tujh sa kahan se aae
har chashm sang-e-kizb-o-adavat se surkh hai
ab aadmi ko zindagi karna kahan se aae
vahshat havas ki chaat gai khak-e-jism ko
be-dar gharon men shakl ka saaya kahan se aae
jad se ukhad gae to badalti ruton se kya
be-ab ainon men sarapa kahan se aae
sayon pe e’timad se ukta gaya hai ji
tufan men zindagi ka bharosa kahan se aae
gham ke thapede le gae nagan se lambe baal
raton men jangalon ka vo saaya kahan se aae
‘nahid’ faishanon ne chhupae hain aib bhi
chashme na hon to aankh ka parda kahan se aae
Leave a Reply