bikhar chuka hai ta.alluq kasao mushkil hai
chalo haTao ki ab rakh-rakhav mushkil hai
lachak ki aḳhiri manzil men aa chuki hai shaḳh
bas aur is se ziyada jhukao mushkil hai
bacha ke rakkha hai ab tak charagh ki lau ko
magar hava hai hava par dabao mushkil hai
hisab-e-sud-o-ziyan ho chuka ab is ke baad
koi bhi joḌ koi bhi ghaTao mushkil hai
abhi udasiyan ḳheme laga.e baiThi hain
abhi to dil men ḳhushi ka paḌav mushkil hai
Leave a Reply