Bijli Giri Hai Kal Kisi Ujde Makan Par

bijli giri hai kal kisi ujde makan par

rone lagun ki hans padun is dastan par

vo qahr tha ki raat ka patthar pighal pada

kya atishin gulab khila asman par

ik naqsh sa nikharta rahega nigah men

ik harf sa larazta rahega zaban par

apne liye hi aankh ka parda huun raat din

main varna ashkar huun saare jahan par

sher aa ke chiir phaad gaya mujh ko khvab men

dam-bhar ko meri aankh lagi thi machan par

pyasi hai ruuh jism sharabor hai to kya

be-kar menh barasta raha saeban par

piili hava men khuun ka zarra uda hi tha

pagal hua ye shahr zara se nishan par

khali padi hain bed ki bimar kursiyan

khun-khvab-dhup-dhund barasti hai lawn par

kis taaza marke pe gaya aaj phir ‘zafar’

talvar taaq men hai na ghoda hai thaan par

Leave a Comment