bigaḌne vaala kisi din sanvar hi ja.ega
mizaj-e-dost bil-aḳhir sudhar hi ja.ega
mariz-e-ishq abhi bekali men hai lekin
buḳhar ek din us ka utar hi ja.ega
jo phuul aaj sar-e-shaḳh hai mahakta hua
vo ek mauj-e-saba men bikhar hi ja.ega
guzar rahi hai pareshan zindagi lekin
chale chalo ki ye rasta guzar hi ja.ega
isi ḳhayal se neki zarur karti huun
ki buund buund se talab bhar hi ja.ega
jo gir ke raah men uThne ka azm rakhta hai
vo paar aag ka dariya bhi kar hi ja.ega
ye soch kar hi ravabit men ijz bhi rakhna
hai jis ki ḳhaak jahan ki udhar hi ja.ega
‘sabila’ ḳhvab men vo sair ko agar nikle
uḌan-khaTole pe pariyon ke ghar hi ja.ega
Leave a Reply