bichhaḌ gaya hai kahan kaun kuchh pata hi nahin
safar men jaise koi apne saath tha hi nahin
kisi se rabt baḌha.en tu mat ḳhafa hona
ki dil men ab tiri yadon ka silsila hi nahin
sab apne apne masiha ke intizar men hain
kisi ka jaise zamane men ab ḳhuda hi nahin
ik umr kaT ga.i kaghaz siyah karte hue
qalam ko apne jo likhna tha vo likha hi nahin
‘qamar’ vo shaḳhs hamare nagar men kya aaya
buton ko bhi hai gila koi pujta hi nahin
Leave a Reply