bhare kamre men udasi ka asar tanha kiya
jaane kya baat thi kya soch ke ghar tanha kiya
ḳhud men jhanka to mire jism se marbut tha vo
main ne jis jis ko bhi ta-hadd-e-nazar tanha kiya
kis ikaa.i ko bikharne duun kise jam.a karun
kahan karna tha badan tanha kidhar tanha kiya
mere malbe ki bachat roz khaTakti thi use
mere vahshi ne mujhe bar-e-digar tanha kiya
kitni mushkil se basaya tira dhaḌka dil men
jism abad na ho jaa.e agar tanha kiya
mujh ḳhala-zad men vo ḳhali jagah chahti thi
karna banta to na tha ḳhud ko magar tanha kiya
ik nishast us ke liye ḳhali rakhi vahshat ki
jis ke hamrah mohabbat ka safar tanha kiya
Leave a Reply