Nirmal Nadeem
bhanvar se bach ke vo sahil ke paas Duub gaya
jahan ka dekh ke ḳhauf-o-hiras Duub gaya
ajab se ḳhauf men lipTa hai gaanv ka panghaT
suna hai phir se koi devdas Duub gaya
mujhe sharab hi itni mili thi duniya se
ki maare sharm ke mera gilas Duub gaya
gavara ho na saka us ko bahr ka ehsan
labon pe le ke qayamat ki pyaas Duub gaya
kahun to kis se kahun apne dil ki taklifen
mire hi gham men mira gham-shanas Duub gaya
hua jo samna suraj ka mere zaḳhmon se
falak pe chhoḌ ke apna libas Duub gaya
‘nadim’ apne ghamon se nikal chuka tha magar
gham-e-jahan se ho kar udaas Duub gaya
Leave a Reply