Suhail Kakorvi
bechain vo rahta hai mire paas se ja ke
dekha hai ka.i baar mujhe us ne bhula ke
aane se tire rang badal degi tamanna
alfaz badal ja.enge ai dost dua ke
ye barq ye gul aur chamakte hue taare
sab jalve hain ye aap ke hansne ki ada ke
main ne bhi bataya ki mira hausla kya hai
tevar to bahut tez the tufan-e-bala ke
zahir hue jab raz-e-mohabbat to ḳhalish kya
jaata hai to jaa.e koi daman ko chhuḌa ke
ham quvvat-e-parvaz men saani nahin rakhte
toḌe hain jo dar band the ham ne hi ḳhala ke
ye maan liya ham to hain nakam-e-mohabbat
tum aur kisi se bhi dikhao to nibha ke
bebak nigahon men miri aisi kashish thi
vo bhuul ga.e aaj to andaz haya ke
in ankhon men aansu the mira haal jo dekha
manzil ne qadam chuum liye aabla pa ke
vo roz ‘suhail’ ek na.i chheḌ kare hai
vo yunhi bigaḌega miri baat bana ke
Leave a Reply