be-ḳhabar huun hosh ka aalam nahin
ye bhi kuchh us ki inayat kam nahin
mere honTon par tabassum dekh kar
kyon samajhte ho ki dil men gham nahin
shan-e-gham is men nahin aansu bahen
qahqahe bhi ansuon se kam nahin
jal uTha hai dil men ik aisa charagh
raushni jis ki kabhi maddham nahin
chashm-e-sha.ir chashm hai nargis nahin
is ka hasil ḳhuun hai shabnam nahin
‘tahira’ jis men na ho soz-e-darun
sirf ik haivan hai aadam nahin
Leave a Reply