be-chehragi-e-gham se pareshan khaḌe hain
ham phir bhi vo zalim hain ki jiine par aḌe hain
gham se jo buland aur masarrat se baḌe hain
aise bhi ka.i daagh mire dil pe paḌe hain
tariḳh ke safhon pe jo insan baḌe hain
un men bahut aise hain jo lashon pe khaḌe hain
kya kya na hamen ghar ki udasi se gila tha
ab shahr se nikle hain to hairan khaḌe hain
aa.i na shikan meri jabin par rah-e-gham men
kuchh aable paḌne the so talvon men paḌe hain
yadon ke ghane shahr men kyunkar koi nikle
har fard ke pichhe ka.i afrad khaḌe hain
rona to ye hai halqa-e-zanjir ki surat
halat ke pairon men hamin log paḌe hain
suraj jo chaḌhega to simaT ja.enge ye log
saa.e ki tarah qad se jo do haath baḌe hain
ham par jo guzarti hai use kis ko bata.en
tanha.i ki aghosh men sadiyon se paḌe hain
halat ke pathrav se bach niklen to jaano
shishe ki tarah ham bhi framon men jaḌe hain
is daur-e-ḳhirad ka ye alamiyya hai ki insan
aap apni hi lashen liye kandhon pe khaḌe hain
sadiyan hain ki guzri hi chali jaati hain ‘nazish’
hain roz-o-mah-o-sal ki chup-chap khaḌe hain
Leave a Reply