bazm-e-jahan-e-shauq ka mehvar bhi main hi tha
auraq-e-dil pe harf-e-mukarrar bhi main hi tha
jitne bhi aks the mire atraf mere the
andar bhi aa.ine ke main bahar bhi main hi tha
barson se jis pe koi bhi dastak nahin hui
is shahr-e-be-charagh men vo dar bhi main hi tha
main ne hi us ke husn ko baḳhshi thi dilkashi
us paikar-e-jamal ka maz.har bhi main hi tha
ilzam-e-na-muradi-e-manzil main kis ko duun
ḳhud apni rahguzar ka patthar bhi main hi tha
dekha to duur tak mira ham-sar na tha koi
socha to apne qad ke barabar bhi main hi tha
bazm-e-suḳhan ki raunaqen sab mere dam se thiin
shahr-e-suḳhanvaran men suḳhnavar bhi main hi tha
Leave a Reply