bazm aḳhir hui sham.on ka dhuan baaqi hai
chashm-e-nam men shab-e-rafta ka saman baaqi hai
kaT ga.i umr koi yaad na manzar na ḳhayal
ek be-nam sa ehsas-e-ziyan baaqi hai
kis ki janib nigaran hain miri be-ḳhvab ankhen
kya koi marhala-e-umr-e-ravan baaqi hai
silsile us ki nigahon ke bahut duur ga.e
kar-e-dil ḳhatm hua kar-e-jahan baaqi hai
haa.e ab tak vahi andaz-e-nazar hai us ka
ab bhi ik silsila-e-vahm-o-guman baaqi hai
aaj ik umr men us aankh ne puchha hai ‘salim’
ab bhi kya pahli si be-tabi-e-jan baaqi hai
Leave a Reply