Rashid Aazar
baaz bhi aao yaad aane se
kya milega hamen satane se
ḳhun-e-dil se diye jala.e hain
ho ke guzro gharib-ḳhane se
kaisi be-raunaqi hai mahfil men
ek is ke yahan na aane se
dar-e-dil va kiya to vo aa.e
kaun aata hai yuun bulane se
tujh se bichhḌe to kab ye socha tha
is qadar honge be-Thikane se
ham to hairan hain ki kyuun ham par
zulm hai aur har bahane se
rahne vaala hi jab na ho ‘azar’
fa.eda kya hai ghar sajane se
Leave a Reply