Jameeluddin Aali
bayan-e-dard-e-mohabbat jo baar baar na ho
koi naqab tire ruḳh ki parda-dar na ho
salam-e-shauq ki jur.at se dil larazta hai
kahin mizaj girami pe ye bhi baar na ho
karam pe aa.en to har har ada men ishq hi ishq
na ho to un ka taghaful bhi ashkar na ho
yahi ḳhayal raha pattharon ki barish men
kahin unhin men koi sang-e-ku-e-yar na ho
abhi hai aas ki aḳhir kabhi to aa.ega
vo ek lamha ki jab tera intizar na ho
bahut fareb samajhta huun phir bhi ai ‘ali’
main kya karun agar un par bhi e’tibar na ho
Leave a Reply