Habib Jalib
baTe rahoge to apna yunhi bahega lahu
hue na ek to manzil na ban sakega lahu
ho kis ghamanD men ai laḳht laḳht dida-varo
tumhen bhi qatil-e-mehnat-kashan kahega lahu
isi tarah se agar tum ana-parast rahe
ḳhud apna rah-numa aap hi banega lahu
suno tumhare gareban bhi nahin mahfuz
Daro tumhara bhi ik din hisab lega lahu
agar na ahd kiya ham ne ek hone ka
ghanim sab ka yunhi bechta rahega lahu
kabhi kabhi mire bachche bhi mujh se puchhte hain
kahan tak aur tu ḳhushk apna hi karega lahu
sada kaha yahi main ne qarib-tar hai vo duur
ki jis men koi hamara na pi sakega lahu
Leave a Reply