bata tu dil ke bachane ki koi raah bhi hai
tiri nigah ki navak-fagan panah bhi hai
saza ke vaste iqrar bhi gunah bhi hai
aur ek tum sa koi dusra gavah bhi hai
khuda ka ghar bhi hai dil men buton ki chaah bhi hai
sanam-kada bhi hai dil apna khanqah bhi hai
ajiib haal hai duniya-parast logon ka
maaad ka bhi khayal aur fikr-e-jah bhi hai
ilahi khizr kahun ishq ko ki ghol-e-tariq
ki rahbar bhi ye hai aur sadd-e-rah bhi hai
usi pe marte hain ham aur usi ko chahte hain
vahi hai aalim o daana vahi gavah bhi hai
gale se aa ke lipat ja khuda ko maan o but
hai aaj tujh pe bhi jauban uruj-e-mah bhi hai
murad tujh se na mangun to kis se mangun main
tikad-gada tire dar ka gada bhi shaah bhi hai
agarche dil se huun banda buton ka main lekin
zaban pe kalma-e-tahrim-e-la-ilah bhi hai
gunah bakhsh de ‘anjum’ ke ai rahim o karim
ki pur-gunah bhi hai aur uzr-khvah bhi hai
dikhaega kise mahshar men apna munh ‘anjum’
siyahkar bhi hai aur ru-siyah bhi hai
Leave a Reply