ahmad-adil

Bas Har Ek Raat Yahi Jurm Kiya Hai Maine

bas har ik raat yahi jurm kiya hai main ne

la ke khvabon men tujhe dekh liya hai main ne

har baras ziist ka lamha sa laga hai lekin

baaz lamhon men to sadiyon ko jiya hai main ne

chhute jaate hain sabhi ahal-e-kharabat-e-junun

kya ajab aql se sauda ye kiya hai main ne

saghar-e-marg ko suqrat ne pi kar ye kaha

zindagi tere liye zahr piya hai main ne

apne har khvab ki taabir ko paane ke liye

ik samundar tha jise paar kiya hai main ne

tum nahin jante maqtal se Darane vaalo

jaan ka nazrana kai baar diya hai main ne

kaise mumkin hai ki main tujh se tiri baat karun

tere kahne pe to honton ko siya hai main ne

mai-kashi men bhi kai daur guzare ‘adil’

kabhi chullu kabhi saghar se piya hai main ne

More Poems

Leave a Comment