Muneer Niyazi
bas ek mah-e-junun-khez ki ziya ke siva
nagar men kuchh nahin baaqi raha hava ke siva
hai ek aur bhi surat kahin miri hi tarah
ik aur shahr bhi hai qarya-e-sada ke siva
ik aur samt bhi hai us se ja ke milne ki
nishan aur bhi hai ek nishan-e-pa ke siva
zaval-e-asr hai kuufe men aur gadagar hain
khula nahin koi dar bab-e-iltija ke siva
makan-e-zar lab-e-goya had-e-sipahr-o-zamin
dikhai deta hai sab kuchh yahan khuda ke siva
miri hi khvahishen baais hain mere gham ki ‘munir’
azaab mujh pe nahin harf-e-muddaa ke siva
Leave a Reply