Zubair Rizvi
barson men tujhe dekha to ehsas hua hai
har zaḳhm tiri yaad ka andar se hara hai
vo kaun tha kis samt gaya DhunDh raha huun
zanjir dar-e-dil koi khaTka ke gaya hai
ji chahe use vaqt ke hathon se uḌa le
jo ruuh ki ḳhamosh guphaon men mila hai
patthar ke sanam puujo ki miTTi ke ḳhudavand
har bab-e-karam der hui band paḌa hai
puchho na mire ahd ke insan ki hikayat
tanha.i ke sahraon men hairan khaḌa hai
Leave a Reply