barson ashkon se vuzu ka silsila karte rahe
ham namaz-e-zindagi yuun bhi ada karte rahe
ham barabar dosti ka haq ada karte rahe
aur vo rozana ik fitna khaḌa karte rahe
ham bayan ro ro ke dil ka mudda.a karte rahe
ahl-e-mahfil muskura kar vah-va karte rahe
kya bata.en zindagani ishq ki kaise kaTi
vo jafa karte rahe aur ham vafa karte rahe
umr-bhar ahl-e-vatan ne baat tak mujh se na ki
log meri qabr par phir jamghaTa karte rahe
chand ke manind mukhḌe ki ziya-pashi ke gird
apni zulf-e-ambarin se vo ghaTa karte rahe
ik nazar tu ne na dekha bismilan-e-zar ko
log tera zikr-e-chashm-e-surma-sa karte rahe
vo jinhen aa.i mayassar ibtida-e-mal-o-zar
ham pe har lahza sitam ki intiha karte rahe
ahl-e-danish dekhen un ki sadgi bechargi
jo vasilon ke bharose par ḳhata karte rahe
rahravo ruk jaao socho is paheli ka javab
rahnumaon ke nishane kyuun ḳhata karte rahe
kya suna.en jan-ba-lab qaumon ki bimari ka haal
dard baḌhta hi gaya juun juun dava karte rahe
ho na paaya jan-ba-lab lakhon gharibon ka ilaaj
ahl-e-sarvat tanduruston ki dava karte rahe
ho ga.e koshish men apni kaam vaale kamyab
aur nakara muqaddar ka gila karte rahe
main to bahr-e-gham ke tufanon se Takrata raha
log kuchh sahil pe baiThe tabsira karte rahe
man tura haaji bagoyam tu mora haaji bago
sha.iran-e-pesha-var ye mashghala karte rahe
shar-pasandon ki ri.ayat men faqihan-e-kiram
zisht ko ḳhuub aur rava ko narava karte rahe
sarguzisht apni to saari ye hai ai rabb-e-rahim
darguzar karta raha tu ham ḳhata karte rahe
raat chashm-e-‘raz’ pahron ashk barsati rahi
khel ke shauqin rona kirkira karte rahe
Leave a Reply