barmala vo bhi agar ham ko dagha deta hai
dil-e-betab use munh pe suna deta hai
vo sitam-kesh jab azar naya deta hai
ham samajhte hain ki ulfat ka sila deta hai
ishq ki aag to hai yuun bhi fana ka paigham
dil-e-na-fahm abas is ko hava deta hai
aazma leta huun ahbab ko gahe-gahe
varna dene ko to har chiiz ḳhuda deta hai
aur kuchh bhi ho magar is se to inkar nahin
ishq insan ko insan bana deta hai
main jo piita huun bila-nagha sharab ai vaa.iz
kyuun tujhe chiḌ hai agar mujh ko ḳhuda deta hai
rahbari vo hai ki asuda-e-manzil ho koi
varna rasta to har ik shaḳhs bata deta hai
ab na kyuun naaz karun apni vafa-keshi par
ab to ḳhud dost mujhe dad-e-vafa deta hai
saqi-e-bazm ka ye ḳhaas karam hai ‘sahir’
dekhte hi mujhe nazron se pila deta hai
Leave a Reply