Poet
gaya sab andoh apne dil ka thame ab aansu qarar aaya
nasib jaage sitara chamka phire din apne vo yaar aaya
kaho ye saaqi se aa khudara kare na kashti-e-mai kinara
khuda ki rahmat ne josh maara barasta abr-e-bahar aaya
uthai kya kya na main ne zahmat magar na ki tark us ki ulfat
raha hamesha main saaf tinat kabhi na dil par ghubar aaya
hua hai kya tuur shoala-afshan bhadak uthi atish-gulistan
jalae deta hai dagh-e-hijran kahan se ud kar sharar aaya
khuda nibahe ye ashnai hamen ye ulfat ke laag bhaai
kisi din us par jo dhuup aai yahan qalaq se bukhar aaya
kate tadapne men zindagani na li kisi ne khabar hamari
ye haal puchha ki arsh tak bhi hamara naala pukar aaya
khatak hai ankhon men meri ab tak dil us ka bhi ho raha hai dhak-dhak
na diid mujh ko hui mubarak na raas us ko singar aaya
kamand-e-zulf-e-rasa se baare bache to mizhgan ne tiir maare
ghazab hai pesh-e-nazar tumhare jo koi aaya shikar aaya
bichhaya kamre men farsh jhat-pat durust ki sej ki sajavat
suni jo main ne kisi ke aahat guman guzra ki yaar aaya
kabhi jo baaje ki lahr aae havas udaae vo shab bajae
fusun ke bolon pe gat banae chhalava ban kar sitar aaya
chale jo ashiq pe tir-o-khanzar hua vo sarsabz surkh ho kar
chadha sar us ka agar sinan par nihal-e-ulfat men yaar aaya
use samajhte hain jo hain ghazi ki sar katana hai sarfarazi
karega kya koi ishq-bazi men jaan bad ke bidhar aaya
hui ye barbad zindagani rahi na hasti ki kuchh nishani
saba ne har chand khaak chhani na haath musht-e-ghubar aaya
ye chahne vaale chahte the gale ka haar apna kar ke rakhiye
diye na kis kis ne us ko dhage na dam men vo gul-ezar aaya
visal-e-mahbub ki tamanna kisi par izhar ki na aslan
qiran-e-saadain main ne puchha jo koi akhtar-shumar aaya
chahak rahe hain chaman men bulbul mahak rahe hain khule hue kul
chhalak rahe hain piyala-e-mul khushi hai abr-e-bahar aaya
batao ai ‘bahr’ apni jab ki kisi se tum ne bhi dil-lagi ki
khush aai surat kisi pari ki kisi pe tum ko bhi pyaar aaya
Leave a Reply