barishen ḳhuun ki tez hain tez hain ḳhuun ki andhiyan
chak-dar-chak uḌne lagin ḳhuun men ziist ki chhatriyan
raat petrol ki aag se shahr men yuun charaghan hua
kaanp kar bujh ga.iin dil ke raushan jharokon ki sab battiyan
be-aman ḳhalq curfew-zada roz-o-shab ke andhere men gum
apni gardan men Daale hue apne katbat ki taḳhtiyan
donon hi likh rahi thiin lahu se mire saneha qatl ka
ik taraf hamla-var astin ik taraf pasban vardiyan
gar yunhi aag daman se uThti rahi to jala Dalegi
husn-e-gul-rang ka pairahan ishq-e-gulnar ki dhajjiyan
jalti ankhon ke moti pighalte rahe aur ehsas ke
reg-zaron men tapti rahin mere ḳhvabon ki parchha.iyan
marg-e-amboh ka jashn-e-matam hai raushan karen ham ‘shahab’
phuljhaḌi ashk-e-ḳhush-rang ki taaza zaḳhmon ki mahtabiyan
Leave a Reply