Barish-E-Sang Se Gul Chaak Hua Chahte Hain

bārish-e-sañg se gul chaak huā chāhte haiñ

sab usī ḳhaak kī poshāk huā chāhte haiñ

yuuñ tire shahr meñ badlī hai havā-e-ḳhush-rañg

jitne ma.asūm haiñ chālāk huā chāhte haiñ

fikr kā āb-e-ravāñ ab nahīñ rukne vaalā

ham usī bahr ke pairāk huā chāhte haiñ

sab ko rahtī hai yahāñ shahr-e-amāñ kī ḳhvāhish

itne hālāt ḳhatarnāk huā chāhte haiñ

raushnī bechne vaale ye ujāloñ ke safīr

bastiyāñ phūñk ke ġhamnāk huā chāhte haiñ

merī sohbat kā natīja hai ki saare mazlūm

ek hī vaqt meñ bebāk huā chāhte haiñ

Leave a Comment