Sanjay Mishra Shauq
barish-e-sang se gul chaak hua chahte hain
sab usi ḳhaak ki poshak hua chahte hain
yuun tire shahr men badli hai hava-e-ḳhush-rang
jitne ma.asum hain chalak hua chahte hain
fikr ka ab-e-ravan ab nahin rukne vaala
ham usi bahr ke pairak hua chahte hain
sab ko rahti hai yahan shahr-e-aman ki ḳhvahish
itne halat ḳhatarnak hua chahte hain
raushni bechne vaale ye ujalon ke safir
bastiyan phunk ke ghamnak hua chahte hain
meri sohbat ka natija hai ki saare mazlum
ek hi vaqt men bebak hua chahte hain
Leave a Reply