Arpit Sharma Arpit
baare gham-e-firaq uThata raha huun main
sham.a jala jala ke bujhata raha huun main
sare-jahan ko dil se bhulata raha huun main
bas yaad teri dil men basata raha huun main
divar-o-dar ke dil ke nazar ke ḳhayal ke
har aa.ine se ḳhud ko chhupata raha huun main
nazren uTha ke dekh bhi le ik nazar mujhe
ai dost teri bazm men aata raha huun main
baḌhta rahe shabab ye har roz har ghaḌi
a.ina ban ke tujh ko sajata raha huun main
is shahr-e-be-vafa men jafaon ke ba.ad bhi
‘arpit’ vafa ke phuul khilata raha huun main
Leave a Reply