Band Bahar Se Meri Zat Ka Dar Hai Mujh Mein

band bahar se miri zaat ka dar hai mujh men

main nahin khud men ye ik aam khabar hai mujh men

ik ajab amad-o-shud hai ki na maazi hai na haal

‘jaun’ barpa kai naslon ka safar hai mujh men

hai miri umr jo hairan tamashai hai

aur ik lamha hai jo zer-o-zabar hai mujh men

kya tarasta huun ki bahar ke kisi kaam aae

vo ik amboh ki bas khak-basar hai mujh men

Dubne valon ke dariya mujhe payab mile

us men ab Duub raha huun jo bhanvar hai mujh men

dar-o-divar to bahar ke hain Dhane vaale

chahe rahta nahin main par mira ghar hai mujh men

main jo paikar men andar ki huun be-tegh-o-zirah

akhirash kaun hai jo sina-sipar hai mujh men

maarka garm hai be-taur sa koi har-dam

na koi tegh salamat na sipar hai mujh men

zakhm-ha-zakhm huun aur koi nahin khuun ka nishan

kaun hai vo jo mire khuun men tar hai mujh men

Leave a Comment